मेरा हरियाणा

यो इसा मेरा हरियाणा था..
जित दूध दही का खाणा था..
बैठक में हुक्का बाज्या करता..
एक मोर मंडेरे नाच्या करता..
कतई सीधा सादा बाणा था..
यो इसा मेरा हरियाणा था..
जित दूध दही का खाणा था..
मदद ने हर हाथ तैयार होया करता..
आपस में प्यार होया करता...
ना किते कोई चौकी थाना था...
यो इसा मेरा हरियाणा था..
जित दूध दही का खाणा था..
बीर दामण में इतराया करती..
पनघट पर तै पानी ल्याया करती..
मर्दां का धोती कुरते का बाणा था..
यो इसा मेरा हरियाणा था..
जित दूध दही का खाणा था..
इब नशे में युवा चूर रहवै..
घर कुणबे तै दूर रहवै..
पहल्यां मेहनत तै खेत कमाणा था..
यो इसा मेरा हरियाणा था..
जित दूध दही का खाणा था..
मनीष इब कतई नाश हो लिया..
बैर इब सबका खास हो लिया..
पहल्यां यहां भाईचारे का ठिकाना था..
यो इसा मेरा हरियाणा था..
जित दूध दही का खाणा था..